وأنا على شط البحر

أجمل حاجة انك تحس انك أنت مالك دنيتك بمعنى انك أنت المتحكم الوحيد فيها محدش له دخل ولا تصرف فيها انك تحس انك حر منطلق مفيش حاجة بتخليك متقيد تحس انك في عالم تاني ملكك انت وبس وانا قدام البحر بحس بكل ده اه فعلا أنا قدام البحر بحس إني بملك الدنيا واني البحر دا هوا حياتي بكل وسعه و طوله ايللي ملوش نهاية وبحس اني حرة من غير قيود بنطلق معاه بطوله وعرضه وامواجه توديني وتجبني زي المرجيحة ايللي بتعد عليها عشان تستريح من طريق طويل كنت ماشي فيه وأخيرا لاقيت حاجة تستريح عليها.
البحر دا اجمل حاجة في الدنيا وانا معاه بقول كل ايللي أنا عايزاه بشكيلو همي وأشركه في فرحتي وبحس ان الموجه ايللي جاية بتاخد كل همومي وتوديها بعيد أوي
كتير كنت بتكلم مع البحر وقوله على ايللي مش بقدر أقوله لحد وكتير كانت بتوه دموعي وسط ميته
وكتير كانت ضحكتي بترن مع صوت الموجه
ساعات بحس إن البحر عامل زي الصديق ساعات بيكون وفي أوي معاك و ساعات بيكون غدار
بجد اسعد لحظات حياتي وان على شط البحر وبجد نفسي أوي أعيش في البحر مش جوا البحر يعني وإنما كتير بقول يا سلام لو الواحد عنده مركب يخدها ويعيش وسط البحر بعيد عن الناس والزحمة والدهان ايللي مبهدلنا بس برجع اخاف من غدره.
ويا سلام بقه على صوت الموجه وهي رايحة جاية والقمر بدر أد إيه بحس براحة لما بشوف البراح وانك مافيش حاجة واقفة قدامك سدا عليك الدنيا .
ياااااااااة أد أيه البحر دا احمل حاجة في الدنيا أنا بجد بحب البحر أوي البحر دا بيفكرني بحد عزيز على قلبي أوي عامل زي البحر لما بيكون هادي بيكون إنسان جميل أوي وممكن قي لحظة يثور ويتقلب بس في نفس الوقت الاختلاف الوحيد بنهم انو لما بيتقلب ويثور بيكون احن من البحر .
مش عرفة أقول أد إيه بكون سعيدة وأنا على البحر بس كل الممكن أقوله شكرا ليك يا بحر عشان بتسمعني وعشان موجتك بتخدني لأبعد مكان في الدنيا وعشان أنت أجمل حاجة في الدنيا وأخيرا عشان أنت بتفكر ني بحد عزيز عليا أوي